Johan van der Watt (regs op foto)
DA-kandidaat, Wyk 15, Breedevallei
Langerug | Somersetpark | Worcester-Wes Leightonpark | Wyzersdrift | Chavonnes
Beste Wyk 15-inwoners en vriende
Ek stel myself graag bekend sodat julle gerus kan voel as julle my op 4 November as julle raadslid verkies. Ek is 'n doen-mens wat al 20 jaar in die wyk woon. Ek help al sedert 2014 waar ek kan om probleme rondom my op te los en ons strate veilig, netjies en inwonervriendelik te hou. Met rdl. Johan Pieters se verhuising het ek voor ’n kruispad gekom en die besluit geneem om my werk in die gemeenskap in ’n amptelike rol voort te sit.
By hom, as raadslid en boesemvriend, het ek geleer watse harde werk en groot verantwoordelikheid dit is om ’n goeie wyksraadslid te wees. Wees verseker ek weet waarvoor ek my inlaat en ek verbind my ten volle tot die taak. Dit sal ’n groot eer wees om julle te verteenwoordig!
My agtergrond
Albei my ouers was in die Pionierskool voor hulle ontmoet het. Ek is dus ’n gebore Worcesteriet wat by Worcester Voorbereiding, Primêr en Gimnasium skoolgegaan het. Ek moes as tiener reeds begin werk en het by Boland Skryfbehoeftes en die Dros begin. Later jare het ek KWIKSPAR Breedevallei bestuur en die bekroonde SPAR Q Square op die been gebring, wat ek vir ses jaar met trots bestuur het. Van 2022 af bedryf ek my eie besigheid wat jaar op jaar groei, want hoë standaarde en goeie diens is maar net deel van wie ek is.
Ek het my vrou ontmoet tydens haar internskap by die Worcester Standard. As joernalis en redakteur (tot 2016) het sy net so ingeburger geraak in die gemeenskap soos ek. Ons is in 2005 getroud en het ’n klein huisie in Worcester-Wes gekoop. Albei ons kinders is hier gebore en ons woon steeds baie gelukkig hier.
Die munisipale verkiesing is op 4 November.
As jy in Wyk 15 bly en wil stem vir ’n KANDIDAAT WAT JY VERTROU om in jou belang te werk, moet jy IN WYK 15 GEREGISTREER wees voor die kiesersrol sluit.
Maak asseblief seker!
My ondervinding in die wyk
Ek is lief vir ons dorp en glo ek het ’n verantwoordelikheid om dit vir ons kinders op te pas. Ek is ook ’n probleemoplosser wat vas glo ’n mens kla nie net nie, jy maak ’n plan. My vorige betrokkenheid in die gemeenskap sluit in:
• Ek was in 2014 ’n stigterslid van die Worcester-Wes Aksie Groep.
• In 2016 het ons dit omgeskakel in ’n buurtwag vir Worcester-Wes. Ten spyte van uitdagings met brandstofkoste ens., ry ons steeds gereelde patrollies om beligting en ander veiligheidsrisiko’s te identifiseer, aan te spreek en goeie verhoudings met sekuriteitsmaatskappye en die plase te bou.
• Ek het 2016-2021 in die Wyk 15-wykskomitee gedien. So het ek die BVM se operasionele werk indiepte leer ken. Ek het in die huidige termyn steeds ondersteuning gegee met die historiese kennis en kontakte tot my beskikking.
• In 2025 was ek in die span wat die tegniese voorbereiding en deeglike navorsing gedoen het oor inwoners se behoefte aan ’n spesiale aanslag-area in Worcester-Wes. Hierdie werk sal net voortgaan indien en soos inwoners se behoeftes ontwikkel.
• Hoewel dit nie direk op ons wyk van toepassing is nie, dien ek in my kinders se skoolbeheerliggaam waar ons die bestuur van openbare fondse volgens die toepaslike wetgewing en met erns en verantwoordelikheid oorsien.
Ek verstaan baie goed dat dit kennis van ingewikkelde munisipale wette en sisteme, energie, moed en persoonlike motivering kos om alle belastingbetalers in jou gemeenskap regverdig en met dieselfde ywer te dien. Maar ek geniet dit om so betrokke te wees en verbind my graag formeel om julle belange te verteenwoordig.
Volg my gerus op sosiale media of loer van tyd tot tyd in om op hoogte te bly van dit waarmee ons besig is in ons wyk.
Al my kontakbesonderhede en skakels is onderaan hierdie webblad.
Hoekom DA?
Ek staan namens die DA, want dit is ’n party van doeners, soos ek. Die DA het reeds bewys dit is moontlik om met ’n positiewe ingesteldheid op te daag, openbare fondse met verantwoordbaarheid te bestuur én te bou aan lewendige gemeenskappe wat mense insluit, nie uitsluit nie.
Oral in die land werk munisipaliteite met groot uitdagings wat geen party kan wegwens nie. Maar ervaring maak saak. Die land se DA-munisipaliteite en provinsie is die beste bewys dat hulle die regte kombinasie van waardes, verantwoordbaarheid, doen-ingesteldheid en beproefde ervaring gebou het om ons gemeenskappe te laat werk. Ek is ’n praktiese mens en kies om met ’n positiewe ingesteldheid op te daag saam met ’n span wat reeds bewys het hulle kán.
Ek hoop ek het jou vrae beantwoord oor wie ek is en waarom ek as DA-kandidaat staan. Kontak my asseblief te enige tyd as jy verder wil gesels.
Ons wyk is ’n gemeenskap wat wérk. Ons hou dit graag so!